انت ليه عملت كده ؟! انت ليه قلت اللى قلته؟!
حياتنا مليانه بتحديات ..تحديات من كل نوع بس من اكتر التحديات اللى حسيتها صعبة علي وعلى ناس كتير هو تحدي التواصل بنضوج فى العلاقات و فتح نفسى على شخص تانى وانى أشتغل طول الوقت على الأفكار السلبيه عن نفسى و عن الشخص التانى و اللى بتمنع وجود علاقة مشبعة للطرفين.
ممكن تكون بتقول فى نفسك أيه الكلام الكبير ده ..انا معاك انه معقد لكن صدقنى انه الطريقة دى هى الوحيدة اللى ممكن تساعدك تعيش سعيد لكن انا هنا عايزه أقف عند نقطة وحده بصارع فيها انا شخصياً ..هى وحدة من سمات النضوج فى العلاقات و علشان مكنش بخترع انا هنقل السطور اللى بتحكى عنها فى كتاب من أحلى الكتب اللى قراتها فى حياتى. الكتاب ده أسمه لماذا أخشى أن أقول لك من أنا؟ تأليف الأب جان باول اليسوعى وصفحة 57:
" القاعدة الأولى: العلاقة العميقة الحميمة (انفتاح عاطفى وصدق) يجب أن تخلو من الحكم على الآخر.
انا لن أصبح ناضجا بما فيه الكفاية لكى أدخل فى علاقة صداقة حقيقية، إلا عندما أفهم وأقتنع أنه لا يمكننى أن أحكم على نية إنسان أخر. يجب أن يكون لدي من التواضع والتعقل ما يجعلنى أخشع أمام سر الأنسان وتشعبات شخصيته. وإذا حكمت عليك، فذلك يعنى أننى لم أنضج بعد ولا أصبحت أهلا لأن أدخل فى صداقة حقيقية معك."
السطور دى بتقول انه لو انت مقلتليش بالظبط اللى حاسس بيه فى كلامنا أو تجاهى انا مش المفروض احاول أتخيل اللى جواك ..لأنه دايما هيكون فى احتمال ان تفسيرى يكون صح او غلط .. كثير قوى بنحاول نفسر تصرفات اللى حوالينا تجاهنا .. فمثلا لو متعود ان حد معين يتعامل معاك بطريقة معينة .. مثلا بيجى كل يوم يصبح والنهاردة مصبحش و جه بكرة واتكرر الموقف .. اغلب الناس هتعمل حاجة من 3 : أما هطنش وتقول برحته .. انا معملتلوش حاجه .. يمكن مووووده مضايق أو في حاجه شغلاه ..أو هتروح تسأله مالك ؟ ..ليه ماجتش تصبح ؟!! أوهتسأل هو انا ضايقتك فى حاجة.. أصلك ماجتش تصبح وده مش عادتك ؟؟ فى رأي أحسن تصرف هو الثانى .. لأنه فى أهتمام بالأخر ومفهوش أى نوع من الجزم او التوقعات ولا كمان أتهامات لنفسينا ممكن متكونش حقيقية.
يمكن لأننا ما اتعلمناش أزاى نعبر عن اللى جوانا بصراحة و نتكلم عن الحاجات اللى مضيقانا من الناس اللى حوالينا فعلطول بنفتكر انهم هما كمان مضايقين مننا و مش بيعبروا ..وده سلوك مش صحى اتعود اغلبنا عليه ان مكنش كلنا.. اننا نحاول نفسر الكلام اللى مش متقال ..اللى بين السطور فى السلوك والكلام المنطوق .
لما تبقى مش عارف تفهم اللى قدامك انت محتاج تسأل و تستفسر منه هو مش من حد تانى إيه بالظبط اللى حاصل .. و لو قالك كلام صعب تصدقه كمل جربه .. متحكمش من الأول أنه مش حقيقى الا لو كنت جربته فى نفس الحاجة أكتر من مرة قبل كده .. كل حد فينا بيتغبر كل دقيقة فبلاش تحكم انه أى حد مش ممكن يتغير وده مش هيمنع الحكمة والحذر برده .. لكن هيقول أننا محتاجين نتواصل اكتر ونفهم اللى جواننا وجو اللى عايزين نكون معاهم صدقات وعلاقات عميقة ومشبعة و ده تحدى مش قليل لكن مش مستحيل .
